A comparsa de Xigantes e Cabezudos volve ás rúas de Baiona e as tradicionais cucañas marítimas da Anunciada ao porto pesqueiro despois de dous anos sen celebrarse pola pandemia

Hai unha festa que é referencia ao verán de Baiona e ese feito ineludible é a celebración da festa na honra da Virxe da Anunciada, que se celebrará os días 5, 6 e 7 de agosto. O Concello de Baiona iniciou os preparativos para celebrar unha das festas máis esperadas na Vila. Por este motivo, a Concellería de Cultura informa que ata o 3 de agosto, estará aberto o prazo de inscrición para participar nos tradicionais xogos de cucañas marítimas e no desfile de Xigantes e Cabezudos, enmarcado dentro do Programa Baiverán 2022.

As cucañas marítimas de Baiona organízanse anualmente o primeiro domingo de agosto, dentro da programación da Festa da Anunciada, pero levaban dous anos sen celebrar por mor da pandemia. Este ano, o domingo coincide co 7 de agosto, e o porto pesqueiro acollerá estas actividades tradicionais de Baiona a partir das 17.00 horas. Poderán participar calquera persoa maior de idade e maiores de 12 anos con autorización. Establécense dous premios: bandeira normal (10 euros) e bandeira especial (20 euros).

Por outra banda, a comparsa de Xigantes e Cabezudos tamén regresa ás rúas da Vila despois de dous anos de ausencia. Aberto o prazo para inscribirse nesta, tamén tradicional, comparsa baionesa que desfilará polas rúas do Centro Histórico o sábado 6 e o domingo 7 de agosto. Neste caso tamén poderán participar os maiores de 12 anos.

O grupo de Xigantes e Cabezudos estará formado por dez cabezudos (O Ratiño, Popeye, Diaño, Napoleón, Negro, Negro, Pallaso Cabezudo e Pallaso Cabeciño, Gato Cabeziño e Bruxa Cabeziña) e dous Xigantes ( Rei e Raíña), que bailarán ao son da música durante o percorrido polo casco histórico de Baiona. Establécense dous premios, Cabeza Grande (30 euros) e Xigante (150 euros).

As inscricións formalizaranse mediante a inscrición no Concello ou a través da sede electrónica da páxina web www.baiona.gal, para calquera dúbida ou consulta pódese dirixir á Concellería de Cultura do Concello de Baiona, situada no segundo andar da Casa do Concello. ou chamar ao 986355921.

Documentación:

20220621_Publicación_Anuncio_ANUNCIO BASES PARTICIPACIÓN COMPARSA GIGANTES Y CABEZUDOS ANUNCIADA 2022

SOLICITUDE COMPARSA XIGANTES Y CABEZUDOS ANUNCIADA 2022

AUTORIZACIÓN COMPARSA XIGANTES Y CABEZUDOS ANUNCIADA 2022

Realizado por: Marta González Pérez
Responsable de Prensa
Email: gabinetedeprensa@baiona.gal