O Pleno do Concello de Baiona aproba unha modificación de crédito de 906.887 euros para a reforma integral do paseo Pinzón tras 40 anos

O Pleno do Concello de Baiona aprobou na sesión do xoves 17 de marzo unha modificación de crédito de 906,887euros para a reforma integral do Paseo Pinzón, un espazo público gañado ao mar fai máis de catro décadas.

O proxecto será cofinanciado xunto coa Deputación de Pontevedra, que achegará 837,119 euros. O resto do montante completarase con cargo ao remanente de tesourería, aforro municipal do Concello.

O Alcalde considera urxente actuar neste recinto peonil de algo máis de 6.000 metros cadrados para frear o afundimento do terreo que se agrava tras máis de corenta anos de acción do mar sen mantemento. A transformación será total e a solución levará a cabo de acordo ao estudo geotécnico e topográfico realizado na zona para modernizar unha das áreas de recreo máis concorridas da vila, especialmente os días de marusía para observar a ondada.

O proxecto contempla renovar o recheo e dotalo cunha cámara de aire para acabar cos afundimentos do terreo. As obsoletas baldosas da superficie serán substituídas por formigón puído coloreado. Crearase unha zona de xogos para os máis pequenos e zonas verdes. Tamén se renovará todo a iluminación, apostando pola máis eficiente.

A intención do Alcalde, Carlos Gómez, e o Concelleiro de Urbanismo, Víctor Muñoz, é sacar a concurso o proxecto nos próximos días, para iniciar as obras antes do verán. Prevese que teñan unha duración de polo menos oito meses.
“O balcón ao atlántico do noso municipio, unha zona na que se poden ver unha das mellores postas de sol do mundo, será máis accesible e moderna para gozar dela durante todo o ano”, resalta o Alcalde, Carlos Gómez Prado.

A reforma integral do paseo Pinzón será a primeira fase dun plan de reordenación de todo o ámbito situado entre as praias urbanas da Concheira e A Ribeira. “Queremos redefinir toda esa área dividida en tres espazos illados. Empezamos polo paseo Pinzón porque é o máis urxente pero abordaremos tamén A Palma e o paseo Ribeira para convertelos nunha contorna unificada, esteticamente homoxéneo que conserve o carácter histórico e o uso deportivo e de lecer”, finaliza o rexedor.

Realizado por: Marta González Pérez
Técnica de Comunicación
Email: gabinetedeprensa@baiona.gal