O PLENO DO CONCELLO DE BAIONA APROBA POR UNANIMIDADE A IMPLANTACIÓN DA FIGURA DO DELEGADO DE PROTECCIÓN E O PROTOCOLO PARA ACTIVIDADES DE LECER E DEPORTE CON MENORES

A corporación municipal apoia de xeito conxunto esta medida para garantir contornas seguras e libres de violencia para a infancia e a adolescencia no ámbito local.

O Pleno da corporación do Concello de Baiona aprobou por unanimidade de todos os grupos políticos a posta en marcha da figura da persoa Delegada de Protección, así como o protocolo de protección nas actividades de lecer e deporte con nenos, nenas e adolescentes (NNA).

Con este acordo plenario, a institución ratifica o seu firme compromiso co benestar e a seguridade dos máis novos, asegurando que calquera actividade municipal ou organizada por terceiros cumpra cos máis altos estándares de prevención e protección.

Esta medida atopa a súa base legal na Lei orgánica 8/2021, do 4 de xuño, de protección integral á infancia e á adolescencia fronte á violencia (LOPIVI). Esta lexislación establece no ámbito do deporte e do lecer a obrigación de aplicar protocolos de actuación fronte á violencia. Do mesmo xeito, impón ás entidades que realizan de forma habitual actividades con menores a designación dunha persoa delegada de protección e o establecemento dun sistema de seguimento.

En Galicia, tras a aprobación por parte da Xunta en 2024 dos protocolos específicos para o deporte e o tempo libre, dita estratexia serve de base para adaptar as obrigacións ás actividades concretas desenvolvidas por concellos, clubs, asociacións e empresas adxudicatarias.

A designación da educadora familiar, Arantxa Rial Lema, como persoa delegada de protección resulta fundamental porque permite contar cunha referencia clara e visible dentro de cada entidade ou actividade. Deste xeito, os propios menores, as súas familias e o persoal técnico saben exactamente a quen acudir ante calquera dúbida, sospeita ou incidencia. A súa existencia facilita unha resposta máis rápida, ordenada e eficiente.

A persoa delegada encárgase de difundir o protocolo, velar polo seu cumprimento e iniciar as comunicacións correspondentes en caso de detectarse unha posible situación de risco, evitando improvisacións ou respostas tardías. Así mesmo, axuda a crear contornas máis seguras, transmitindo que a protección dos menores é unha prioridade real da entidade e non unha mera formalidade.

Nas actividades de menor envergadura, esta figura poderá recaer nun membro da propia entidade, da directiva ou en persoal externo, primando sempre a súa accesibilidade e capacidade de actuación.

O protocolo, pola súa banda, ofrece un marco común de actuación que define as canles para previr, detectar, comunicar e actuar ante situacións de violencia. Deste xeito, evítase que cada incidencia sexa tratada de forma distinta, achegando seguridade xurídica e organizativa. Alén de ordenar as responsabilidades establecendo quen coordina, quen adopta as medidas inmediatas ou como se articula a relación cos servizos sociais, sanitarios e forzas de seguridade, o documento posúe unha marcada función preventiva.

O protocolo regula aspectos tan sensibles como as normas de bo trato, o uso seguro dos espazos, o control de accesos, as regras en vestiarios, os desprazamentos, as comunicacións dixitais e o uso de imaxes. Para rematar, facilita o rexistro e seguimento das actuacións, o que permite introducir melloras continuas en futuras edicións de campus, campamentos ou actividades deportivas.

A persoa delegada de protección e o protocolo configúranse como instrumentos plenamente complementarios: mentres o protocolo marca as regras de xogo, a persoa delegada asegura que se coñezan e se activen cando cumpra. O respaldo unánime de toda a corporación no Pleno subliña que ambas as ferramentas non constitúen unha mera formalidade burocrática, senón medidas estritamente necesarias para garantir contornas seguras, mellorar a prevención e coordinar de xeito óptimo as respostas.

Coa aprobación desta iniciativa, a corporación municipal avala que todas as entidades e administracións que promovan, organicen, financien ou executen actividades deportivas ou de lecer con menores no termo municipal deban dispoñer obrigatoriamente destes mecanismos de protección.

Concello de Baiona