Recepción no Concello de Baiona aos nenos e nenas saharauís do programa Vacacións en Paz e ás súas familias de acollida

O alcalde de Baiona, Jesús Vázquez Almuíña, reafirmou o compromiso do concello co programa de “Vacacións en Paz”, na recepción dos nenos e nenas saharauís participantes no proxecto. Este programa de acollida familiar temporal pon a énfase en catro aspectos fundamentais: educativo, sanitario, social e lúdico.

“É o acto máis bonito desta semana e estou moi contento”. Desta maneira iniciou o alcalde a recepción no Salón de Plenos da Casa do concello, xunto á concelleira responsable da área de Política Social, Ana María Iglesias. Vázquez Almuíña destacou que Baiona “é unha localidade solidaria” e agradeceu a todas as familias que, verán tras verán, acollen a nenos e nenas saharauís procedentes dos campamentos de refuxiados de Tinduf, para axudarlles e garantirlles un verán en paz.

Ao acto asistiron tamén outros concelleiros da corporación municipal e os nenos e nenas saharauís coas súas respectivas familias de acollida, un total de catro familias baionesas participan neste bonito proxecto de acollida.

Realizado por: Marta González Pérez
Responsable de Prensa
Email: gabinetedeprensa@baiona.gal