A intervención da Policía Local de Baiona salva a vida a un peregrino en parada cardiorrespiratoria no Centro histórico

A rápida intervención da Policía Local de Baiona logrou salvar a vida a un peregrino que entrou en parada cardiorrespiratoria no interior dun establecemento hostaleiro do Centro histórico. O home, de 68 anos, foi trasladado ao Hospital Álvaro Cunqueiro.

Dous axentes locais foron alertados do ocorrido e trasladáronse de inmediato dada a súa proximidade lugar do suceso. Á súa chegada, atopáronse co home tendido no chan, e, tras unha rápida avaliación dos seus constantes vitais, determinaron que se atopaba en parada cardiorrespiratoria e iniciaron as manobras de reanimación cardiopulmonar utilizando o desfibrilador dos técnicos da ambulancia de Baiona. Despois foi trasladado ao hospital Álvaro Cunqueiro.

Desde a Policía Local destacan que a “rápida” intervención de dous axentes, os seus coñecementos en primeiros auxilios e a correcta utilización do desfibrilador DESA “fixeron posible que este suceso non acabase en traxedia”.

Así, lembran que o tempo de chegada ao lugar é esencial e disto depende a supervivencia da vítima, xa que está comprobado que, ante unha parada cardíaca, a posibilidade de vivir da persoa redúcese entre un 7 e un 10% a cada minuto que pasa.
A Policía Local de Baiona conta desde hai anos cun equipo DESA, e todos os axentes contan cun certificado de formación tras realizar un curso específico de reanimación cardiopulmonar (RCP) para utilizalos con total seguridade.

O Alcalde de Baiona, Jesús Vázquez Almuiña, quere dar as grazas aos axentes “polo seu excelente labor” e desexa unha “pronta recuperación ao peregrino para continuar a súa aventura no Camiño de Santiago”.

Realizado por: Marta González Pérez
Responsable de Prensa
Email: gabinetedeprensa@baiona.gal