O Alcalde de Baiona esixe ao SERGAS que “cubra con urxencia as prazas vacantes no centro de sáude” e advirte de “listas de espera de ata seis meses nalgúns servizos”

O alcalde do Concello de Baiona, Carlos Gómez Prado, esixe á Consellería de Sanidade da Xunta de Galicia que “cubra con urxencia as prazas que hai vacantes no centro de saúde da nosa vila”.

Segundo a propia Xunta recoñece no Plan de Mellora de Atención Primaria de Galicia, en función do número de habitantes de cada concello, “no centro de saúde de Baiona faltan dous médicos, un pediatra e tres enfermeiras máis, ademais de persoal administrativo, celadores e auxiliares de enfermería”, afirma o alcalde.

Na plantilla actual do centro de saúde hai sete médicos de familia, un pediatra e sete enfermeiras, “pero temos unha baixa médica de longa duración sen cubrir, e no pasado verán non chegou o médico de reforzo polo incremento de veraneantes, como era habitual”.

“Ademais, temos un serio déficit nos servizos comúns para o Val Miñor que se prestan na Xunqueira, con esperas de ata seis meses por unha cita en saúde mental, psiquiatria e psicoloxia, ou radioloxia”, engade Gómez Prado.

O goberno local apoia todas as reivindicacións da Plataforma en Defensa da Sanidade Pública do Val Miñor, que forma parte de SOS Sanidade Pública.

De feito, asistirá e apoia a manifestación en defensa e mellora da sanidade pública que, baixo o lema de “Queremos a nosa Atención Primaria”, percorrerá este domingo as rúas de Santiago de Compostela.

No próximo pleno municipal debatirase tamén unha moción en defensa da sanidade pública, “un dereito dos nosos veciños e veciñas que temos que defender”, remata o alcalde de Baiona.