O Concello de Baiona tomará medidas para conseguir o equilibrio entre o lecer nas terrazas co goce dos espazos públicos da veciñanza

O novo Equipo de Goberno do Concello de Baiona tivo unha primeira reunión cos empresarios e empresarias do sector hostaleiro que desenvolven a súa actividade na Vila co obxectivo de lograr o equilibrio entre a actividade do sector e o goce da veciñanza.

O Alcalde de Baiona, Jesús Vázquez Almuíña, o Concelleiro de Urbanismo, José Ángel Bahamonde Rodríguez, e o Xefe da Policía Local de Baiona, Plácido Viéitez, participaron na reunión xunto a unha corentena de empresarios e empresarias, entre as que se atopaban o Presidente da Asociación de Comerciantes e Empresarios de Baiona (ACEBA), Marcos Comesaña.

Durante a asemblea, o rexedor baionés presentou ao empresariado “a necesidade de realizar unha solicitude formal de instalación de terrazas en espazos de uso público para todos aqueles locais que a teñan sen tramitar”.

Desde o Concello de Baiona repartiuse entre os presentes as follas de solicitude oficiais para tramitar a solicitude nun prazo de 10 días. Así mesmo, desde a administración local infórmase que o documento está ao dispor de todas aquelas persoas que o desexen nas dependencias de urbanismo a administración local.

Vázquez Almuíña anunciou a aprobación de novo da ordenanza municipal que regula esta actividade para que a partir do tempo de trámite establecido entre en vigor a súa aplicación. Introduciranse todas aquelas emendas presentadas que melloren a mesma.

O Alcalde de Baiona reiterou o apoio do Equipo de Goberno á actividade económica hostaleira, “buscando o equilibrio co goce da veciñanza e as persoas visitantes” ”.

A este respecto, na reunión tamén se tratou o tema da ocupación da vía pública con respecto á accesibilidade, a limpeza das terrazas, así como a mellora na eliminación de residuos, especialmente os orgánicos. Tamén se considera importante a retirada do mobiliario durante as noites.

“O obxectivo destas medidas é lograr o equilibrio entre a actividade económica, o lecer nas terrazas e o goce da veciñanza dos espazos públicos do Concello de Baiona”, destacou o rexedor.

A Policía Local do Concello de Baiona realizará controis dos distintos espazos para que se cumpra coa ordenanza municipal.

A continuación, pode descargar o formulario de solicitude de instalación de terrazas en espazos de uso público:

Formulario Solicitude Instalación Terrazas

Realizado por: Marta González Pérez
Responsable de Prensa
Email: gabinetedeprensa@baiona.gal