O Alcalde de Baiona mantén unha reunión telemática con responsables da Consellería de Sanidade e suspende a programación cultural do nadal ata nova orde

Carlos Gómez Prado, alcalde de Baiona, mantivo este xoves ao mediodía unha reunión telemática con responsables da Consellería de Sanidade na que se valorou a evolución epidemiolóxica da Covid-19, despois de que se comunicou que o municipio atópase en nivel de alerta máxima. Tras analizar pormenorizado a situación, o rexedor baionés decidiu suspender as actividades da programación cultural do Nadal, Bai Nadal, ata nova orde marcada pola Consellería de Sanidade da Xunta de Galicia.

O alcalde apela, máis que nunca, á responsabilidade colectiva e individual para que se reverta a curva de contaxios e volvamos a unha situación de certa normalidade, como acontecía ata fai non moito. Ademais Gómez Prado tamén se reuniu co oficial xefe da policía local, co fin de analizar a situación e as medidas para implementar a nivel local.

O rexedor sinala que “é preciso que manteñamos a tranquilidade e a serenidade, e que interioricemos cal é a nosa nova normalidade”, ademais de chamar a unha actitude “dun pobo cohesionado e unido”. Así mesmo, insístese en que a cidadanía manteña as medidas de seguridade e hixiene establecidas polas autoridades sanitarias, como son o uso obrigatorio da máscara, o mantemento da distancia interpersoal, o lavado continuado de mans e a utilización de xel hidroalcólico.

Desde esta medianoite, as veciñas e veciños de Baiona non poden entrar nin saír da vila excepto en casos estritamente necesarios e xustificados. Así mesmo, prodúcense algunhas modificacións en canto ás reunións sociais e funcionamento dalgúns sectores produtivos. Neste sentido limítanse os grupos para o desenvolvemento de calquera actividade ou evento de carácter familiar ou social na vía pública, espazos de uso público ou espazos privados, a un máximo de catro persoas, excepto no caso de persoas conviventes en que non se aplicará esta limitación .

Ademais, nos establecementos de hostalería e restauración estará prohibido o consumo no interior, e tan só permitiranse as terrazas ao 50 %, cun horario de peche ás 17.00 h. A ocupación máxima será de 4 persoas por mesa ou agrupación de mesas, respectando a distancia mínima de seguridade interpersoal entre elas. No documento oficial da Xunta de Galicia, establécese o peche temporal de certas actividades consideradas non esenciais, entre as que se atopan as dos locais de lecer nocturno, salas de festas ou centros de lecer infantil, entre outras.

Para todas as dúbidas que teñades, deixamos o documento da Xunta de Galicia cun resumo das medidas en nivel máximo de alerta:
Restricións nivel máximo Covid-19

Realizado por: Marta González Pérez
Técnica de Comunicación
Email: gabinetedeprensa@baiona.gal