Baiona destina un investimento de 40.000 euros á pavimentación e mellora de accesibilidade da Granxa en Belesar

O Concello de Baiona, a través da Concellería de Vías e Obras, impulsou dúas actuacións coas que levará a cabo a pavimentación da estrada da Granxa e do camiño Cachadas en Belesar. A actuación, que aparella un investimento próximo aos 40.000 euros comezará hoxe coa pavimentación desta zona da parroquia de Belesar.

“A intervención consistirá na adecuación, mellora e renovación tanto da estrada principal da Granxa como do camiño cumprindo cunha das principais peticións dos veciños e veciñas desta zona.”, destaca o Primeiro Tenente de Alcalde e Concelleiro de Vías e Obras, Óscar Martínez e expón que “para o goberno local é un asunto prioritario a mellora e rehabilitación da importante rede viaria rural municipal para garantir a operatividade e o desprazamento dunha maneira fluída e segura”.

Pola súa banda, o Alcalde, Carlos Gómez Prado, sinalou que “A estrada se atopaba en moi malas condicións e cambiará radicalmente grazas a esta intervención coa que damos resposta a un dos compromisos que asumimos desde o equipo de Goberno cos veciños e veciñas do Barrio da Granxa” afirmou o rexedor reiterando que “o meu compromiso é continuar traballando polos veciños e veciñas do noso municipio vivan onde vivan”.

Así mesmo indicou que as obras “beneficiarán a todas aquelas persoas que fan uso regular desta estrada, tanto pola veciñanza como as persoas que traballan na fábrica de Auga Sana ”. O arranxo deste vial realizarase desde o centro social da Granxa ata a citada fábrica e tamén ao longo do camiño Cachadas.

Hoxe xa comezaron a executarse a roza das cunetas e marxes e o reperfilado das cunetas. Tamén se realizarán drenaxes lonxitudinais de forma previa á eliminación de fochancas e fochas existentes. Tras iso comezará a extensión do novo pavimento. As obras culminarán coa nova sinalización horizontal e vertical, de forma que se asegure unha circulación cómoda e segura aos usuarios desta estrada.

Esta obra inclúese no paquete de obras de adecuación e mellora da seguridade viaria e accesibilidade dos viais que está a desenvolver o Concello de Baiona. Trátase dun proxecto cofinanciado pola Dipuatación de Pontevedra nun 65% ao Plan Concellos 2020 e polo Concello de Baiona nun 35%.

Realizado por: Marta González Pérez
Técnica de Comunicación
Email: gabinetedeprensa@baiona.gal