O alumnado dos centros educativos de Baiona aprende sobre a importancia da reciclaxe de residuos para o coidado do medio ambiente

A Concellería de Medio Ambiente do Concello de Baiona, está a colaborar coa Concellería de Educación, para que os máis pequenos do municipio aprendan acerca da importancia da reciclaxe de residuos para o coidado do medio ambiente. Os coñecementos chegan como método dinámico, “aprendendo xogando”, aos colexios do municipio.

A primeira destas acciónes de concienciación baixo este lema levou a cabo para todo o alumnado do CEIP Fontes- Baíña. A Concelleira de Medio Ambiente, Ruth Álvarez González, e a Concelleira de Educación, Nuria Leyenda Gómez, acudiron ata o centro educativo para participar nesta iniciativa xunto aos máis pequenos.

O estudantado dos diferentes ciclos de educación deste centro escolar de Baiona recibiron durante a xornada charlas dirixidas a promover a concienciación ambiental e a coñecer o funcionamento do punto limpo municipal.

O obxectivo destas charlas é concienciar e implicar aos máis pequenos na correcta separación dos residuos nos distintos contedores de reciclaxe.

As actividades chegarán ao resto de centros eduativos municipais de primeria: o CEIP de Belesar, C.E.P. Sabarís, e ao CPI de Cova Terreña.

Un técnico de FCC, a empresa encargada do punto limpo e a recollida de residuos selectivos no municipio, é o encargado de impartilas en colaboración coa concellería de medio ambiente do Concello de Baiona.

A campaña de educación ambiental apoiada desde o Concello de Baiona persegue fomentar que o municipio continúe aumentando os seus cocientes de reciclaxe e diminuíndo a cantidade de residuos do contedor da fracción resto que leva a valorizar energéticamente en SOGAMA, co aforro económico que isto supón.

Cos nenos, que son os cidadáns do futuro, realízanse actividades para que adquiran conciencia da importancia de separar correctamente os residuos. Explícaselles a estratexia das tres 3R: REDUCIR, REUTILIZAR E RECICLAR, e convídaselles a que poñan en práctica esta estratexia cos maiores do seu fogar. Por outra banda, achégase aos estudantes conceptos como a compostaxe ou os puntos limpos, como modelo dunha correcta xestión de residuos municipais, que irán cobrando máis importancia no futuro.

A iniciativa tivo unha gran acollida tanto entre o alumnado como entre a comunidade educativa.

“O obxectivo desta iniciativa é a promoción da educación ambiental. Concienciar aos nenos e nenas do municipio, e grazas a eles ás familias, da importancia de separar os residuos correctamente e de como se debe usar o punto limpo municipal”, sinalan desde o departamento municipal de medio ambiente.

Realizado por: Marta González Pérez
Responsable de Prensa
Email: gabinetedeprensa@baiona.gal